Salerno: l’angolo del cuore con le liriche in vernacolo di Mario Farina
In memoria di Don Vincenzo Pagliara
Asciute ra na guerra,
c’aveva semmenato sciumme ‘e lacreme,
nce steva tanta voglia
‘e ridere e ccantà.
Se cresceva, a cchell’èbbreca,
attuorno â chiesia e ssott’ô campanaro.
Spanneva ggioia ll’aria;
p’’e viche se cantava e sse pazziava…
e ffin’a mmezanotte ‘int’a ll’està!
Arrivaje Don Vincenzo
cu ssimpatia accuóveto
e affetto da ‘o quartiere.
Predecatóre eccelso,
aducatore fuje, pastore ‘e core.
Attuorno a isso figliulelle, ggiuvane
e ggente ‘e tutt’aità… a uno a uno
’e ssapeva piglià!
Lucerna spirituale d’’o quartiere,
se faceva accapì
da chi aveva struzzióne
e ‘a chi nn’aveva scola.
‘A fanciullezza mia… ll’adulescenza
… appriesso a Ddon Vincenzo!
Èramo, tanno, tutte
uagliune ‘e miez’â via:
‘o vicolo… era ‘a casa!
Currenno e ppazzïànno
a gghi’ â duttrina propio ‘un ce penzavamo.
Ma Don Vincenzo, cu ggrazzia e ddurgézza,
ce carriaje a ttuttequante â chiesia…
‘nt’a cchilli tiempe sempe
chiena chiena ‘e fedele,
chiene ‘e criature ‘e cconnule.
Po ll’anne so’ vvulate…
ma sempe Ddon Vincenzo ce ha ncantate,
e ffin’a cche ‘o Signore s’’a chiammato,
cu omelie colte e appassiunate.
E cchi se pô scurdà!
‘A messa soja, ‘n latino ‘e chilli tiempe…
suonno doce… subbrime!
‘A voce, melodiosa,
crïava n’aria solenne, affatata:
attuorno dint’a nniente
accumpareva ‘o cielo chino ‘e stelle,
‘a Madonna tra ll’angele
cu ‘o Bbammeniéllo mbraccio…!
Mmo songo nonno e ancora
‘a voce soja io sento…
“Pater de coelis deus,
miserere nobis…
Agnus Dei, qui tollis peccata mundi,
miserere nobis…”.
Ra dint’ô core mio,
m’esce ‘sta museca angeleca, e ll’anema,
leggia, na palummèlla!
… se perde comm’a ttano
‘nt’a cchella sinfonia
antica e ccelestiale.
‘A primma Cummunione
Jucavo cu ‘e cumpagne
a ppallone na sera
‘nt’â scesa a nnanz’â chiesia
r’’a Maronna dd’’e Grazzie.
Chino ‘e stelle era ‘o cielo,
e ddoce doce ll’aria e ssenza viento…
Me chiammaje don Vincenzo,
e ppropio ‘int’ô cchiú bbello:
“Maruzzié!, viene cca!”.
“No… dòppo, don Vincè!… sto’ pazzïanno”.
Fa’ ampressa, curre cca!…
te ll’aggi’’a dì na cosa
guaglió, sempe ddoje vote!
Mme pigliaje p’’a manélla
e mme purtaje ‘int’â chiesia.
Llà mme ricette: “Maruzzié, addenucchiate!”,
e ffuje ‘a primma vota
ca i’ mme cunfessaje.
Nun m’allicordo quante Avemmarie
e Ppate Noste tanno avett’’a rice.
Êv’’a scuntà ‘e peccate…
ra quann’i’ ero nato erano assaje!
‘Nt’â chiesia i’ nce passavo ‘o meglio tiempo,
ma nun stevo maje cujeto
e nce ‘a facevo perdere
‘a capa a ddon Vincenzo.
Mm’’a dette ‘a ‘ssuluzzione…
e mme pigliaje ‘a primma Cummunione.
Na Madunnella po me rïalaje
accussí piccerella
c’a stiento se vedeva, era bbellella!…
na vrancata ‘e cunfiétte…
e a ll’urdemo… na bbella pergamena!,
addó nc’era Ggiesù e nu criaturo
addenucchiato cu ‘e mmanélle ggiunte.
 fine m’azzeccaje dduje vase nfaccia…
“Aurio, Maruzzié!,
‘a primma Cummunione te ll’hê fatta”.
A cchell’ebbreca ‘a vita accussí jéva,
scarpe mèze sfunnate,
cazune arrepezzate…
però, miseria a pparte,
erano tiémpe bbelle chilli llà!